İnformasiya yayımının və kommunikasiya vasitələrinin növlərinin sürətlə dəyişdiyi müasir dövrdə məlumatlara əlçatanlıq əhəmiyyətli dərəcədə asanlaşmışdır. Belə olan təqdirdə, bütün dünya miqyasında saxta xəbərlərin bilərəkdən və ya bilməyərəkdən geniş şəkildə yayılması, eləcə də belə məlumatların müxtəlif ictimai proseslərə mənfi təsiri son illərdə xüsusilə nəzərə çarpmaqdadır. Metodoloji cəhətdən çətin olsa da, günümüzdə dezinformasiyanın yayılma modellərini və təsir dairəsini təhlil etmək dezinformasiyaya qarşı mübarizədə effektiv yanaşmanın tətbiqi üçün zəruri hesab oluna bilər.

I Panel sessiya üzrə ən son yeniliklər nəzərə alınmaqla, dezinformasiya anlayışının təhlili, yeni media müstəvisində dezinformasiya dinamikalarının, mənbələrinin və növlərinin araşdırılması, müasir informasiya platformaları üzrə dezinformasiyanın yayılma arealının müəyyənləşdirilməsi ilə bağlı müzakirələrin aparılması nəzərdə tutulur.

İnformasiyanı tənqidi qiymətləndirmək, istifadə etmək və yaratmaq bacarığı vətəndaşlara informasiya mühitində düzgün məlumat seçimləri etməyə imkan verən əsas bacarıqlardır. Bu, həm də onların müxtəlif ictimai proseslərdə müdaxilədən uzaq və məsuliyyətlə iştirakına təkan verir, nəticə etibarı ilə, dezinformasiyaya qarşı mübarizədə cəmiyyətin yanaşmasını formalaşdırır, düzgün məlumatların dövriyyəsini təmin edir. Hazırki dövrdə mediada şəffaflıq, doğrulama və etibar, açıq məlumat mənbələri kimi bir çox məsələlər dezinformasiyanın qarşısının alınması və bununla əlaqədar, aktiv strategiyaların tətbiqi üçün xüsusi əhəmiyyət kəsb edir. Həm lokal, həm də qlobal perspektivdə informasiya mühiti və məlumatlandırma mexanizmlərinə münasibətdə proaktiv siyasət və təşəbbüslərin həyata keçirilməsi bilavasitə dezinformasiyaya davamlı cəmiyyətin formalaşdırılması və informasiya təhlükəsizliyinin təmin olunmasına səbəb olur. Rəqəmsallaşma dövründə dezinformasiyanın yayılmasının qarşısının alınmasında belə təşəbbüslərin əhəmiyyətli qismi medianın maarifləndirici rolu və etik öhdəlikləri ilə bağlıdır.

II Panel sessiyada dezinformasiyaya qarşı davamlı cəmiyyətin formalaşdırılması istiqamətində strategiya və təşəbbüslər, dezinformasiya təhdidinin aradan qaldırılması məqsədilə qlobal miqyasda daha davamlı onlayn media ekosisteminin qurulması, dezinformasiyanın yayılmasının müxtəlif media platformaları və növlərindən asılılığı, medianın dezinformasiyanın qarşısının alınmasında necə daha aktiv rol oynaya biləcəyi ilə bağlı fikir mübadiləsi aparılacaqdır.

Texnoloji tərəqqi nəticəsində məlumatın yaradılması və ötürülməsi proseslərinin mütəmadi dəyişməsi, eləcə də məlumat ötürücülərinin sayının kəskin artması texnologiya, dezinformasiya və media savadlılığını çağdaş media mühitinin əsas anlayışları halına gətirir. Belə ki, data yaradılması və ötürülməsi sahəsində texnologiyaların geniş tətbiqi rəqəmsal media mühitini xüsusilə mürəkkəbləşdirir, dezinformasiyanın əhatə dairəsini önəmli dərəcədə genişləndirir, istifadəçilərə məlumat istehlakçısı ilə yanaşı istehsalçısı statusu qazandırır. Məhz bu kontekstdə texnologiyanın reallığa, mediaya və dezinformasiyaya təsirini təhlil etmək və media savadlı istehlakçıların yetişdirilməsini təşviq etmək günümüzün prioritetlərindən biri hesab oluna bilər.

III Panel sessiyada texnologiya və media sahələrinin nümayəndələri, elm xadimlərinin iştirakı ilə dezinformasiyanın yayılmasında və qarşısının alınmasında rol oynayan texnologiyalar, süni intellektin reallığa, mediaya və dezinformasiyaya təsiri, eyni zamanda media savadlılığının dezinformasiyaya qarşı mübarizədə önəmi, rəqəmsal əsrdə dezinformasiyanın yaradılması və yayılmasında süni intellektin yaratdığı imkanlara qarşı həll yolu kimi istehlakçıların media savadlılığının artırılması, bu istiqamətdə müxtəlif tərəflərin effektiv əməkdaşlıq modelləri müzakirə ediləcəkdir.

Dünyada iqlim dəyişmələrinin qarşısının alınması, ekoloji sabitliyin və tarazlığın yaradılması, dayanıqlı inkişafın təşviq edilməsi və bu istiqamətdə əhəmiyyətli nəticələrin əldə olunmasında media xüsusi rol oynayır. Bu səbəbdən media və kommunikasiya vasitələrinin mövcud proseslərdə düzgün istifadə edilməsi, hədəf auditoriyaya hesablanan təsirli mesajları ötürməsi, kütləvi fərqindəlik və məsuliyyət hisslərini formalaşdırması iqlim dəyişmələrinə qarşı kollektiv qabaqlayıcı tədbirlərin görülməsi və ya belə tədbirlərin effektivliyinin artırılmasında zəruridir.

IV Panel sessiyada iqlim hərəkatında medianın rolu, yaşıl dünya naminə effektiv məlumatlandırma mexanizmlərinin hazırlanması, iqlim dəyişmələrinin qarşısının alınması və fəsadlarının aradan qaldırılması istiqamətində ictimai gündəmin yaradılmasında medianın əhəmiyyəti kimi mövzularda müzakirələr aparılacaqdır.